منقوووووووووول

أعجبنى
أنا مش آسف يا ريس ...... علشان عيشتنا في جوع ومرض وحرمان 30 سنة وكنت عايز المحروس إبنك يكمل علينا 30 سنة تانيين .
أنا مش آسف يا ريس ...... علشان سبت شبابنا يموتو في قوارب الموت على شواطئ إيطاليا .
أنا مش آسف يا ريس ...... علشان سبت البطالة تحاصرنا وتخنقنا وتطلع ميتين أهالينا .
أنا مش آسف يا ريس ...... علشان سبت كلاب أمن الدولة تنهش في جسمنا وترهبنا وتنتهك أعراضنا .
أنا مش آسف يا ريس ...... علشان أقسام الشرطة في عهدك بقت أوكار للتعذيب وإهانة المواطنين .
أنا مش آسف يا ريس ...... علشان سبت شعبك يسكن في المقابر مع الأموات وإنت نايم في قصرك.
أنا مش آسف يا ريس ...... علشان ما شفناش ناس بتاكل من صناديق الزبالة إلا في عهدك .
أنا مش آسف يا ريس ...... علشان ما عرفناش ظاهرة إسمها أطفال الشوارع والعشوائيات إلا في عهدك .
أنا مش آسف يا ريس ...... علشان ما شفناش ناس بتموت في طوابير العيش والغاز إلا في عهدك .
أنا مش آسف يا ريس ...... علشان خليت مهية المواطن ما تكفيهوش لحد خامس يوم في الشهر .
أنا مش آسف يا ريس ...... علشان سبت التجار يحتكروا أقواتنا ويلعبوا بينا ويرفعوا الأسعار زي ما هم عايزين .
أنا مش آسف يا ريس ...... علشان سبت مرض الكبد الوبائي ينهش في أكباد الشعب المصري .
أنا مش آسف يا ريس ...... علشان أكلتنا قمح مسرطن ، ولحوم فاسدة ، ومواد منتهية الصلاحية ، وشربتنا مية المجاري لحد ما انتشر فينا السرطان والفشل الكلوي وكل أمراض الدنيا المستعصية .
أنا مش آسف يا ريس ...... علشان سبت المزارعين إللي ما عندهمش ضمير يأكلونا خضروات مسقية بمية المجاري .
أنا مش آسف يا ريس ...... علشان سبت الحرامية ينهبو ثروات البلد وثروات الشعب ويهربوها برة البلد.
أنا مش آسف يا ريس ...... علشان التعليم في عهدك بقا زبالة .
أنا مش آسف يا ريس ...... علشان الرعاية الصحية في عهدك بقت زبالة .
أنا مش آسف يا ريس ...... علشان الزبالة وطفح المجاري في عهدك بقا الصفة المميزة للشارع المصري .
أنا مش آسف يا ريس ...... علشان كل حاجة في عهدك بقت ملوثة .. الهوا ، والمية ، والنيل ، والشوارع ، والسياسة ، والفن ، وحتى ضماير الناس بقت ملوثة .
أنا مش آسف يا ريس ...... علشان حرمتنا من الحرية وزورت الانتخابات وسلمت البلد للبلطجية يتحكموا فيها .
أنا مش آسف يا ريس ...... علشان سبت حرامية السلطة يبيعوا ممتلكات مصر وأراضي مصر بأبخس الأثمان للتجار وللمستثمرين .
أنا مش آسف يا ريس ...... علشان في عهدك بقى الشعب يموت بالميات والآلاف في العبارات ، وفي حوادث القطارات ، وتحت أنقاض العمارات وصخور الجبال .
أنا مش آسف يا ريس ...... علشان خليت شوية عيال يحتكروا الحياة كلها في مصر ويقسموها بينهم وكأنها عزبة ورثوها من أهاليهم .
أنا مش آسف يا ريس ...... علشان في عهدك بقت مصر من أكتر دول العالم نسبة أمية وناس عايشة تحت خط الفقر .
أنا مش آسف يا ريس ...... علشان بعت الغاز للصهاينة بأبخس الأثمان .
أنا مش آسف يا ريس ...... علشان الفساد في عهدك بقى للركب ... (بشهادة سكرتيرك الدكتور زكريا عزمي)
أنا مش آسف يا ريس ...... علشان كرامة المواطن المصري برة بلده ما تهانتش واتمسح بيها الأرض إلا في عهدك .
أنا مش آسف يا ريس ...... علشان عيشتنا 30 سنة تحت حكم قانون الطوارئ وكأننا أعداء ليك مش شعبك اللي المفروض تحميه وتسهر على راحته .
أنا مش آسف يا ريس ...... علشان سبت كلاب أمن الدولة يزرعوا بذور الفتنة الطائفية بين أفراد الشعب المصري المسالم علشان يقدروا يسيطروا عليه .
أنا مش آسف يا ريس ...... علشان حرمت مصر من واحد من أهم مصادر الدخل ليها وتشغيل العمالة وهو زراعة القطن ، إللي كان قبل عهدك أفضل قطن في العالم .
أنا مش آسف يا ريس ...... علشان خليت شعبك يشرب المية من الجراكن ، ويستنى فناطيس المية يا جت يا مجتش ، والنيل ماشي قدام عينيه وهو عطشان ، وزرعه عطشان ، وكلاب السلطة عمالين يسقوا ملاعب الجولف بتاعتهم من مية الشعب المصري الغلبان .
أنا مش آسف يا ريس ...... علشان ، مصر ، بلد النيل ، عرفت في عهدك بس حاجة إسمها (الفقر المائي) .
أنا مش آسف يا ريس ...... علشان سبت حرامية الأراضي يجرفوا الأرض الزراعية اللي حيلتنا ويحولوها لعمارات ومنتجعات .
أنا مش آسف يا ريس ...... علشان في عهدك ضاع البحث العلمي ، وهاجر العلماء للخارج ، وخرجت الجامعات المصرية من التصنيف الدولي لأفضل الجامعات .
أنا مش آسف يا ريس ...... علشان ضيعت أموال الشعب المصري في مشاريع فاشلة في توشكى وترعة السلام ، وغيره .. وغيره ..
أنا مش آسف يا ريس ...... علشان التحرش الجنسي ، والبلطجة ، وفساد الذمم والأخلاق كان سمة أصيلة من سمات عهدك .
أنا مش آسف يا ريس ...... علشان حاصرت أهلنا في غزة ووطيت راسنا قدام أشقائنا العرب .
أنا مش آسف يا ريس ...... علشان مكانة مصر في عهدك على المستوى العربي والإفريقي والدولي بقت في الحضيض .
أنا مش آسف يا ريس ...... علشان إنت كان لازم تمشي من زمان ، وتتخلع من زمان ، وتتحاكم من زمان .

الجمعة اللى فاتت

اللى هييجى جنب الأسلام هنقطعه ( ايه ياجماعة هو احنا كفرة والا اتباع ملة اودين تانى ) .. مصر اسلامية  وليست علمانية او ليبرالية ... ولا اله الا الله محمد رسول الله .... الشريعة هى هدفنا وتطبيقها بدمائنا ..... تلك الشعارات هى التى كانت سائدة فى ميدان التحرير الجمعة 29 يوليو .. فيما اتفق على تسميتها جمعة وحدة الصف ... وأول من شق الصف هم الإخوة السلف .... وأنقل شهادة من شاهد عيان على هذا اليوم من التحرير .... ( العيال بتوع 6 ابليس والإخوان الخونة والعلمانيين والليبراليين كانوا مشغلين أغانى ثورية ... دخلنا وقعدنا نهتف لأن الجمعة دى بتاعتنا احنا خليناهم يدخلوا الجحور ولو كانوا نطقوا كنا قطعناهم ... وبعدين هيمشونا على مزاجهم هددناهم اللى هيفتح بقه هنعرفه شغله ) هم دول اللى كانوا فى التحرير ويرفعون الشعارات السابق ذكرها .. وسألتهم رحتوا التحرير ازاى قالوا ان الجمعية الشرعية مطلعة اتوبيسات رايح جاى ووجبة ومية ؟؟؟؟؟؟ ويامشايخ ليه التحرير وهو مهد الثورة على المخلوع ما كان ادامكم ميادين كتير ومعنى نزول الدكتور / عبد المنعم الشحات الى التحرير وهو اسكندرانى وعنده ميدان القائد ابراهيم الا اعترافا ً بقدسية وشرعية التحرير ... ومحاولة احتلاله واغفال باقى القوى الثورية فيه هو قمة الديكتاتورية ... لا مصادرة على رأي ولا فكر ... طبقوها يطبق عليكم وكفاكم شعارات تظهر أنكم الوحيدون فى مصر الذين تدافعون عن دين الله....

وبهدوء وبدون تخوين او ضرب من تحت الحزام ؟؟؟؟؟

الإخوة السابق ذكرهم 30 عاما لا يفتحون أفواههم الا بالدعاء للحاكم وكلما افترا عليهم أمكن الدولة البائد كلما زادوا استكانة .. كل ذلك منطقى .. انما هم نفس هؤلاء عندما اندلعت الثورة كانوا خطباء ا ً فى مساجدهم ومساجد الدولة فى تحريم الخروج على المخلوع .. واتهموا الجميع بأننا مؤمركين وننفذ أهدافا ً أمريكية وصهيونية لزعزعة البلد .

وعند نجاح الثورة ظهروا على السطح ليأخذوا على الجاهز من مكاسب الثورة ( بالطبع منهم من شارك منذ اللحظة الأولى فى الثورة .. انما الحديث عن زعمائهم ) ... ما علينا ... وصحيح وأبصم بالعشرة أن هؤلاء هم درع واقى شديد المراس عن دين الله ... لكن ياعالم لا تكفرونا عندما نتكلم عن الدستور أولا ... ولا تلقوا بنا الى مراتب ابو جهل وأبو لهب اذا عارضناكم فيما تقولون ...ولا أشك لحظة فى ان الخمسين أو الستين أو حتى الملايين من التحالفات ينكر اسلامية مصر أو حتى مصدر التشريع الأول وهو الإسلام .. نحن ببساطة 90% مسلمين من تعداد الشعب ااتونى بمجنون يحارب هذا الإحصاء ؟؟؟؟؟؟؟؟ لكن أن تفرضوه علينا يامشايخ فهو قمة الجنون فكأنك تطلب ان تطلع الشمس بالنهار ... ياعالم ما الشمس موجودة يردون : لأ بكلامكم الشمس كدة هتطلع بالليل ..... أريد أن اذكرهم بأنهم لم يظهروا الا بعد يوم 12 فبراير .. ولن نلقى اتهامات ولن نتكلم فى عدم الوطنية لأنهم مصريون مسلمون ونفتخر بهم فهم حماة الدين .... فرفقا ً بنا يا مشايخ .

بعد الأخبار المتواترة من مؤامرة المخلوع على الجيش أثناء الثورة بإقالة القائد العام ( المشير طنطاوى ) يفسر الكثير لكن يامجلس أرجوكم صارحوا الشعب .. حتى نعبر هذا النفق .. ويامشايخ رحمة بنا ورفقا ً فحتى النصارى والعلمانيين والليبراليين والثوريين ( من قاموا فعليا ً بالثورة على الطاغية ) أصحاب الثورة الحقيقيين وليس أنتم ولا ترفعوا شعار أن الجيش معكم ... الجيش جيش مصر وليس جيشكم وحدكم والمجلس العسكرى نصب نفسه هيئة سياسية حاكمة فهو ليس فوق النقد والهجوم السياسي فيما يخالف ما نعتقد أنه صحيح .... كل سنة وانتم طيبيبن ... رمضان كريم

http://www.dostor.org/politics/egypt/11/july/29/49701

الجمعة الجاية

بيقولوا جمعة التصالح ... كل فصائل الشعب المصري ستتصالح فى هذا اليوم .. هل هو جيد للمجلس العسكرى ام ضد رغبة المجلس ؟؟؟؟ الكثير وأنا منهم ارى ان المجلس الى الآن يتعامل بطريقة مباركية مع الشعب .. ربما لأنهم أقسموا له يمين الولاء قبلا .. رغم اعترافهم بالفساد الواضح والظاهر لكل ذى عينين ورائحته التى تزكم الأنوف .. لكنهم يخرجون مبارك من كل ماسبق ويجري تكريمه فى مستشفى 5 نجوم منذ 6 شهور .. صحيح انهم سجنوا ولديه وأركان حكمه ؟؟؟؟ لكن أحدهم وهو الأستاذ عبد الحليم قنديل الثائر المعروف قالها صراحة أنه رغم أنه ضد المجلس وقراراته البطيئة والعكسية بأن هناك ضغوطا ً شديدة تواجه المجلس لا يستطيع التصدى لها .. ويجب على المجلس فى هذه الحالة مصارحة الشعب بما يجري ..... ربما

هذا الأسبوع صدرت وفى الطريق بعض القرارات التى طالب الجميع بها من يوم 12 فبراير وهى التخلص من قيادات العهد البائد فى جميع المواقع وظهرت بوادرها اليوم بإقصاء صفى الدين خربوش وحسن صقر( رئيسا مجلسي الشباب والرياضة) .. المضحك انهما جالسان أماكنهما منذ الثورة الى الآن وكانا معروفين من أنهما من أقدام جمال مبارك ( بركة معتصمى التحرير جابت فايدة ).

أجمل مأروع ما سنراه يوم الجمعة 29 يوليو هو رجوع التوافق مرة أحرى الى عدد لابأس به من فئات الشعب واتفقوا على عدد من المبادئ وهى خطوة جبارة وللحق ان الفضل فى رجوع الحد الأدنى من التوافق على المطالب هى العيال بتوع احنا اسفين يامخلوع ... أوجه لهم جزيل الشكر على حسن تعاونهم مع فئات الشعب ... لأنهم تسللوا فى وسط الظلام متحيلين انهم سيعيدون احياء المخلوع وسط كل الخلافات بين جميع التيارات السياسية والفوضى المصطنعة من ذيول المخلوع .... أظن ان نهايتهم قد قاربت وأن باقى ذيول المخلوع ستبتر ويورونا عاوزين يعملوا ايه ...

 مرتضى منقور عاوز يبقى ريس بس بصراحة مش عارف هو عاوز يبقى ريس ايه .... احتمال جمهوريه الشبشب الواطى تقبله ريس .... ماهو واطى .. متهم فى قضية قتل المتظاهرين مفكر ان مصر هى نادى الزمالك وشعبها جمهور الزمالك بس اللى ما يعرفوش هذا الواطي ان جمهور الزمالك مصري وأولاد مصريين  العجيب فى هذا الشأن ان هذا البتاع استضاف فى قناة مشبوهه زيه اسمها المحور وصاحبها هو رجل أعمال الأسمنت الشهير حسن راتب بتاع هناء وسيد .

تـــــــانى

نقول تانى وتالت ورابع الى مالا نهايه .......... المجلس العسكري الحاكم استحق لقب مجلس مبارك ... هتقوللى فين اثباتاتك الناس اهى مقدمة الفاسدين للمحاكم ..... هههههههههه ياباشا القضية الوحيدة اللى اتحكم فيها قضية اللوحات المعدنية ؟؟؟ فين قضايا الدم المراق فين قضايا القتل والقنص فين قضايا التربح والإستيلاء على المال العام والخاص ... فين قضايا الإتفاقيات المشبوههة ... الخ ؟؟؟؟

الحنكة والخبرة السياسية المفقودة لدى المجلس المباركى ( حتى ولو كان أمينا ً وشريفا ً ) الا انه مسيطر عليه من خلايا موبوءة من الحزب الواطى السابق والإخوة اللى منبت لهم دقون ومسميين نفسهم سلف وطبعا اللصوص الشطار الإخوان .... بدأ هؤلاء فى اخلاء الساحة لهم والتخلص من باقى القوى السياسية الموجودة .. قالك هاتوا 6 ابريل .. والتصريح بتاع اللواء الروينى أكبر اهانة لجيش مصر ومخابرات مصر ومجلس وزراء مصر ولفت التفة اللى رماها على وجهه الكريم وتلا التصريح العجيب بالرمى على كفايه هى كمان ... كانت فين كل الأجهزة دى من زمان؟؟؟؟؟؟؟... والأخوة المذقنين بيضربوا الدفوف من الفرحة والشماتة وطلعاوا من تحت السرابر اللى كانوا مستخبيين تحتها ايام الثورة ... ما علينا .. والا علينا .... يا مجلس اتقى الله فى مصر ... شعب مصر مش هم العساكر اللى تأمروهم يطيعوا وبس حتى لو كانوا غلط ... يامجلس نظف نفسك من مستشاريك اللى هيودوكوا والبلد معاكم فى داهية ... يامجلس بلاش كل شوية تقوللى الشرعية من الإستفتاء ومن ال 77% بتوع نتيجة الإستفتاء ( هو كان استفتاء على ايه ؟؟؟؟؟ )

يامجلس .. انت الى هذه اللحظة أمين على الشعب .... نضفه من البلطجية وخللى الشرطة تشتغل وبعدين اتهاماتك اللى بتوزعها اطلع بالدلائل بتاعتها ووديها للنائب العم .. والا النائب العام حلال على مبارك ورجالته والنيابة والمحكمة العسكرية هى اللى للشعب ... صورة عوجاء مقلوبة!!!!!!!! .. وانا واثق ان الإتهامات دى من مستشارينك السوء ......... يا مجلس اسرع بالمحاكمات .. حتى لو طلعوا براءة .... يامجلس لا نريد ان تتكرر الثورة البلشفية هنا فى مصر ..... رفقا بمصر وناس مصر 

اتعشم ومعى الملايين ان يكون نعبير مجلس مبارك هو الأخير وننتهى من تلك القصة .. أو اعلنوها مباشرة وواضحة المخلوع ما زال هو الرئيس وأركان حكمه هى التى مازالت تحكم

والله هانت وبانت

طبعا واكيد وحتما ان الخط الأحمر مش اللى على فانلة الزمالك لأ ولا محل الجزم اشهير برضة لأ ... دا المجلس العسكرى يانهار مش فايت هو فيه حد عك الخط والا داس عليه ؟؟؟؟؟؟ المجلس طلع بتصريح عجيب وغريب ويهلك من الضحك الهستيري المسبب بعقار العبط والهلوسة المغولى المباركى الشفشوقى.

قال ايه اكتشف اللواء الروينى وله كل الإحترام ؟؟؟؟ بأن العيال بتوع 6 ابريل طلعوا عملاء وقابضين فلوس واتدربوا في صربيا فى معسكرات معروفة على كيفية اسقاط النظم ؟؟؟؟؟؟؟؟؟؟؟؟؟؟؟؟؟؟؟؟؟

مين ... فين ... ليه .. ازاى ..... 

منين مودى على فين ؟؟؟؟

يانهار منيل ب 60 نيلة ... الجيش بجلالة قدره ووطنيته ورصيده الذى يسمح وقف بجانب عملاء وقابضين وانضحك على الجيش ومشا الراجل المحترم اللى اسمه مخلوع ( مبارك سابقا ً ) .... تصريح حتى لو فيه صدق فقد ادى الى نفاذ رصيد المجلس الى الأبد لا ينفع معاه شحن ولا حتى استبدال شريحة....

المجلس العسكري كشر عن انيابه الحقيقية .. ومسنود على الإخوان والسلفيين (الخونة) مش عارف انه مسنود على حيطة مايلة....هو الأخ المخلوع واولاده لسة فى الحكم والا ايه ؟؟؟؟ لغة الخطاب العجيب ده .... بترجعنا لقبل 25 يناير ... عملاء وقابضين .. وكنتاكى وكدة ؟؟؟؟؟؟؟؟ 

الثورة الروسية التانية فى الطريق .... ارجوكم راجعوا مقال انستازيا ........

الضرب شغال على المسيرة السلمية المتجهة الى المجلس العسكرى بالمولوتوف والسيوف .... ورجالة الحزب الواطى بتساعد البلطجية بالمدد.

اديها يا مجلس مبارك ... يا من الغيت الحكم برفع اسمه من على المنشئات العامة .......... يا مجلس مبارك ........

عفوا لقد نفذ رصيدكم

الفل الأصلي

منقول من مدونة 

مصر دماغى

الفِــل كائن أولي يتغذى على برامج القناة الأولى وقد يلجأ في فترات المجاعة إلى الترمم بالتهام الجرائد الحكومية. يعيش في قطعان محدودة العدد في محميات غير طبيعية بميدان مصطفى محمود وميدان روكسي وداخل مبنى الإذاعة والتلفزيون. يتكاثر بالتبرعم ويحن لأيام الذل الغابرة ويعشق الضرب على القفا.

ينتمي حيوان الفل إلى فصيلة الفلوليات التابعة لشعبة مفصليات الأرجل. ويعتقد بعض علماء الارتقاء والتطور أن الفل هو نتاج تطور لأحد العنكبيات التي كانت تعيش قديماً في صحراء شرم الشيخ أثناء العصر الشرمشيخي الوسيط.

يتجمع كائن الفل في مستعمرات قليلة العدد لا يمكن رؤيتها عادة بالعين المجردة، إلا أن علماء التلفزيون المصري نجحوا في اختراع تقنيات لتكبير هذه المستعمرات وإظهارها بشكل أكبر من حجمها الحقيقي.

توجد على السطح البطني لحيوان الفل فجوات هضمية تنقبض وتنبسط وفقاً لحجم تمويل أعضاء الحزب المنحل. كما يتميز السطح الخارجي للفل بوجود أرجل كاذبة يستخدمها حيوان الفل في التسلل أحياناً إلى ميدان التحرير للممارسة بعض الوظائف الفسيولوجية الدنيئة.

نتيجة لعملية تهجين حدثت بين حيوان الفل وحيوان البلطجي في فترة تاريخية سابقة نتجت سلالات أكثر ميلاً للعنف تحمل السنج والمطاوي، وبعض فصائلها نبتت له نسور ودبابير على الأكتاف تختلف باختلاف الأقدميات.

تنقسم فصائل حيوان الفل إلى: فل استكهولمي وفل انتفاعي. والفل الاستكهولمي هو الأكثر انتشاراً بصفة عامة. ويقود كل قطيع من قطعان الفلول فل سمين يتميز بكرش هائل من الأمام ومؤخرة ثقيلة من الخلف ويكون غالباً من سلالة الفلول التي كانت تعيش قديماً في محميات تحت قبة البرلمان وتتغذى على أموال الدولة، وهي سلالة كانت تتميز بوجود أذرع طويلة مرفوعة دائماً إلى أعلى في وضع كان يسميه علماء الحيوان في تلك الفترة بوضع الموافقة الأوتوماتيكي.

يصدر كائن الفل الاستكهولمي أصواتاً قام أحد العلماء بتحليلها باستخدام الموجة القصيرة فتبين له أنه يقول "إحنا آسفين.. إحنا آسفين.. إحنا آسفين"، ولذلك يسمى صوت حيوان الفل بالسفسفة، وفي قول آخر "الفسفسة".

وفي تجربة أخرى مثيرة قام أحد العلماء بالحصول على فل من النوع الاستكهولمي من إحدى محمياته الطبيعية، وبعد أن قام بحبسه وتجويعه لفترة طويلة فوجئ به يلحس جزمته بحماس غريب وهو يصدر فسفسة متقطعة مشروخة النبرات.

الغريب أن الفل مهما فعل أثناء تجمع قطعانه في شارع جامعة الدول فهو لا يحال إلى النيابة العسكرية مطلقاً، وهذا مما يثير الشكوك عند العلماء حول وجود علاقة مؤاكلة أو تبادل منفعة بينه وبين حيوان الفيل أبو زلومة الذي يقوم بحمايته.

أما الفل الانتفاعي فهو نوع من أنواع حيوان الفل كان يعيش على ما يجود به حيوان البقرة الضاحكة (المنقرض حديثاً) من فتات مقابل قيامه بأعمال البلطجة ضد أعدائها الطبيعيين. ونظراً لانقراض حيوان البقرة الضاحكة في فبراير الماضي وما ترتب عليه من انعدام دور حيوان الفل الانتفاعي فقد تحول دوره إلى السعي لإعادة البقر الضاحك إلى الوجود حتى يعود له مصدر رزقه المنقطع.

بعض سلالات حيوان الفل تجيد التحول للتواؤم مع التغيرات المناخية، حيث يخرج حيوان الفل من جلده ويكتسب جلداً مختلفاً عند الضرورة، ولكنه يظل وفياً لسلالته الأصلية مهما قام بتغيير جلده.

أما أنثى الفل فهي تجيد عدة مهارات فسيولوجية نادرة، من بينها مهارات الردح الحلزونية والشرشحة الأفقية المنبعجة. ومن الأمور العجيبة التي اكتشفها العلماء في أنثى الفل أنها تلد، ولكنها أيضاً تمتلك قدرة على أن تبيض عند اللزوم. ويزعم بعض العلماء أن ذكر الفل أيضاً يمتلك القدرة على وضع البيض في حالة انشغال أنثى الفل بالقيام بوظائف فسيولوجية أخرى

منقوووول .

الوزارة الجديدة

هى وزارة جديدة والا مؤقتة ؟؟؟؟ المهم وليس الأهم الدكتور عصام شرف هيختار مين .... وهيجيب منين ناس ممكن نرضى عنهم ( الله يرحمك يا عم نجيب سرور في رائعته الفنيىة الخالدة منين أجيب ناس ) عمنا عصام شرف فى نفس الأزمة ... منين يجيب ناس معروف فى الداخلية والجيش ان غير المغضوب عليهم هم اللى كانوا بيكملوا بعد رتبة عقيد يعنى ناس بتخرج معاش من سن ال 45 واللى بيكمل هم من غير المغضوب عليهم او الموالين والماسحين لجزم النظام وما ينطبق على الداخلية والجيش ينطبق على اساتذة الجامعات والصحفيين والمهندسين ..... الخ!!!!!!!!!! واللى هاجر منهم وطفش وخرج برة البلد قبل مايشرف فى المعتقلات ... التهمة جاهزة انه مش عارف مشاكلنا ومش خحاسس بنبض الشارع ... اذا الوزارة محكوم عليها بالفشل قبل أن تبدأ والحل ايه ؟؟؟؟؟ العيال بتوع اسفين يا مخلوع لقوا ان ميدان مصطفى محمود بقى مشبوه حولوا الدفة لميدان روكسى وبقوا بتوع خليك يامجلس وعليزين المشير والفريق أبالسة والا قابضين والا واطيين ... قول اللى عاوز تقوله ... المهم اننا بنطبق الحديث الشريف ( اذا غضب الله على قوم أصابهم بالجدل ) سنتجادل فى الهايفة والمليانة وده عميل ودة لجنة سياسات وده قفاه طويل وده قصير .... الخ .

يحصل ايه لو وضعنا برنامج علمى محدد بأهداف وخطة زمنية ولتكن 6 شهور .. رئيس الوزراء ومستشاريه يوضعوا خطة بأهداف معينة مرتبطة بخطة زمنية محددة لكل وزارة ويختار لها الوزير المناسب ان شالله يكون نطاط الحيط ينفذ السياسة دى ولو هو مش هيقدر يسيبها بدري  بدري او يتحاكم علنيا زيه زي مجرمى الحرب او ينفذ ما أوكل له .. ان شالله يكون الوزير ده اخو المخلوع مش من رجالته .. لأن ببساطة كما أسلفنا كل النخبة عليها كلام من انهم مواليين للسابق او المخلوع او الحزب الواطى.

منين أجيب ناس ... رحمة الله على الشاعر الساخط نجيب سرور

تخريب متعمد

سؤال ؟؟؟؟ اي تجمع يمكن أن يجمع 50 او 60 الف مرة واحدة فى مكان واحد

الإجابة : ملعب كرة القدم او ميدان التحرير للتظاهر

سؤال :لماذا سمح المجلس العسكرى الموقر بعودة مباريات كرة القدم ؟؟؟

الإجابة : لأنها الشئ الوحيد الذى يمكن تغييب الجماهير عن باقى مطالب الثورة والإندفاع نحو التعصب الأعمى 

سؤال : الشعب لسة فايق وبيطالب بباقى حقوقه من يضمن تأجيج الفتنة والتعصب ؟

جواب : ليس هناك من هم أقدر من اثنين من أقذر من أنجبت مصر ( حسام وابراهيم حسن )أساتذة اللعب بمشاعر الجماهير وأصحاب الصوت العالى وقلة الأدب المتناهية والمعروفين بالخروج على جميع الأعراف والتقاليد من الصغر.

سؤال : ومن سيسمح لهما بهذه الأفاعيل بشعب قام بثورة كانت حديث العالم كله ؟؟

جواب : مجلس لإدارة نادى لا يملك من أمره شيئأ ً ويقوده هذين القذرين الى الهاوية

سؤال : من اين هذه الإتهامات وأين هي أسانيدها ؟؟

جواب : وهل لايلعب كرة القدم غير النادى المنكوب بهذا المرض العضال من مدرب ومجلس ادارة وبعض الموتورين من جماهيره التى لا أعتقد أنها تشجع كرة قدم ... بداية من مباراة الأفريقى التونسى واجتياح الهمج أرض الملعب فيما سمي بموقعة الجلابية والتى اوصلت احساس للعالم أن ثورتنا الشريفة هى ثورة همج ورعاع .. والغريب أن المجلس الموقر وأتحاد الصيع المسمى اتحاد كرة القدم لم يحرك ساكنا ً إما خوفا ً منهما أو بالأحرى فعلا ما هم مأمورين بفعله ... وتبعه 6 مباريات متفرقة يخرج  هذين الأخرقين الى الناس بمهاترات تؤدى الى ايقاع الحرب بين الناس؟؟؟

سؤال : هل مايحدث من هذين مقصود ومتعمد عدم اتخاذ أى اجراءات ضدهما أم انهما ينفذان فقط ؟؟؟

جواب : أعتقد أن السؤال يجيب نفسه ؟؟؟؟؟؟

وانكشف أمامنا مجلس العسكر ومجلس الجبلاية بتاع زاهر ومجلس النادى المنكوب المغلوب على أمره.

أهلا ً بالفوضى .... وهذا مايريده العسكر حتى يظلوا موجودين فوق رؤوسنا

كل من ذهب الى ميدان المخلوع (مصطفى محمود سابقا ً ) لا بد من حرقهم للخلاص من فتنتهم.