ازيك يا خال وازى جماعتك "مراة خالى" .. انا زعلان منك اوى ياخال من يوم ما عملناك عمدتنا وانت فى دنيا غير الدنيا .. ابويا محمد ابو سويلم مات واتسحل ولما شدينا انا واهل البلد على الظالم محمود بيه وحلفنا اليمين انه لازم يمشى كنت انت ساعتها خلعت على مصر وامنت نفسك ولما عرفت الأخبار اننا هنمشى البيه من البلد جيت تانى ووقفت معانا وعلشانك راجل عالم وبتعرف ربنا عملناك العمدة مكانه .. ومحمد افندى اخويا بتاع المدارس قعد يكلم الناس ليل ونهار على علمك وحفظك لكتاب الله وانى كمان ياخال كنت فرحان بيك اوى علشان قلت لى هتجيب الطعمية السخنة للبلد زى ماهى فى البندر .. بس ياخال ماشفناش حاجة وباين ان جماعتك "مراة خالى يعنى " مش مبسوطة مننا وبتقسيك علينا .. حتى ان محمد افندى العيال بتوع قهوة ابو مخيمر رنوه علقة مكن لما جاب سيرتك ادامهم ... انت سايبنا ومدنى ودانك للجماعة "مراة خالى " ليه ياخال.... حتى اصيلة يا خال اللى ما طلعتش دمعة من عينها على ابوها اللى اتسحل ومات علشان البلد .. دلوقتى ما بتبطلش عياط ياخال... بيقولوا فى البلد ان الجماعة مفهماك اننا عاوزين نقتلك ونضربك وانك عملت بتاعة كدة اسمها اعلان .. علشان ماحدش يقوللك حتى سلامو عليكم ممكن تشده من قفاه وترميه فى السجن .. الكلام بتاع المتعلمين ده ما بافهمش فيه وموش عاوز افهم .. نفسى فى الطعمية السخنة ولو حرام هاتها باردة وناكلها وندعى لك ياخال .. والله فى كل صلاة امى " اختك " بتدعى ربنا يهدى الجماعة " مراة خالى " ويحنن قلبها علينا.
والسلام ختام
ابن اختك دياب
ملحوظة : انت عارف ياشيخ حسونة ان دياب لا بيعرف يقرا ولا يكتب وانا اللى كاتب له الجواب ده " اخوك فى النضال سابقا ً..... الشيخ يوسف "
