السنة الجديدة

2011 بيلم اوراقه ومروح بكل أحداثه .. اللى بصراحة أحداث وكمها ومعناها مستحيل تكرارها فى القرن كله على الأرجح .. دا طبعا لو مد الله فى عمر الأرض.... فقد بدأ العام بداية ساخنة امتدادا ً لآخر اسبوعين من العام اللى قبله وتحررت تونس من طاغيتها بداية هذا العام (ابن المحظوظة) .. وبعدها .. مصر مش تونس ماتخافوش يارجالة احنا زى ما احنا وبعدين احنا كنا فى شوية مصايب بدءا ً من تفجير القديسين فى الأسكندرية والقبض على السيد بلال وتعذيبه وانتهاءا ً بقتله .. وفى الآخر قالوا الجيش الإسلامى المجاهد فى افغانستان هو اللى فجر الكنيسة ... وفجأة .. ثار الشعب طلع على الدين هلال أفندى ( طبعا هو دلوقتى تحت البطانية فى بيتهم) وقال 30 الف لايمثلون الشعب المصري .؟؟؟ تانى يوم طلع صافو افندى الشهير بصفوت وقال دى ضريبة الديموقراطية وان فيه مخربين وراء الأحداث وان شوية العيال دول لايمثلون 85 مليون مصرى ( هو دلوقتى فى منتجع طرة بيتش )وعلشان ما نطبلش فى المطبل ... 11 فبراير غار المخلوع فى 60 داهية وعشنا فى فرحة مابعدها فرحة وصدقنا ان طنطاوى قصدى الجيش حمى الثورة وطبلنا ورقصنا وطلعنا فوق الدبابات نحضن العساكر .. بينما الحقيقة المرة الذى لا يمكن أن يصدقها أحد أن طنطاوى أول من خان الثورة هو ورجاله العظام بتقاعسهم الشديد ضد فرض الحراسة على المخلوع وعدم محاكمته الا بعد ان استقر فى شرم الشيخ مدة تجاوز ال 3 شهور رتب فيها أوضاعه وهرب وأخفى ماجمعه من ثروات .. وبعدين بلغت البجاحة انه يطلع بصوته فى قناه عربية يقول فيها خطاب للشعب .. بعدها باين عليه قال لتابعه قفة .. انا مستعد لمسرحية تطول تقصر مش مشكلة المهم انى اخلص من القصة دى .. ونفذوها ومازالوا ينفذونها بكل حرفية ( محاكمات اشبه بمسرحية من مسرحيات ثلاثى أضواء المسرح القديمة ... 50 سنة فاتت ) ولازم الشعب الأهبل يصدق .. قاضى زبالة محامين قذرة ..... جيش وشرطة متواطئة .. وخلال 11 شهر كانت انجازات مجلس العار ... تصفية جميع القوى الثورية اما بإلقائهم بالسجون ( 12000 سجين ) أو تصفيتهم الجسدية بالضرب المباشر المميت .. والأعداد المعلنة بالمئات.. فى أحداث 8 مارس الشهيرة بكشوف العذرية أو أحداث 9 ابريل أو 27 مايو و أحداث ماسبيرو فى سبتمبر والحقوا يامصريين الجيش بينضرب يارجالة علشان يدهسوا الناس (سواء كانوا مصيبين او مخطئين .. مسلمين أو مسيحيين كانوا بش مصريين)أو 28 يوليو أو 18 و 19 نوفمبر الشهيرة بأحداث محمد محمود وأخيرا 18 ديسمبر الشهيرة بأحداث مجلس الوزراء  .. أو بالتصفية المعنوية باتهامات العمالة والقبض من الخارج والإستقواء بدول أجنبية وتشويه السمعة .. اصل بصراحة المخلوع كان احلى من الشرف مافيش ...

ثم كانت الخيبة والفضيحة المدوية .. تعريه وسحل نسوان 

وطبعا مجلس العار وأعوانه قالوا كتير من اتهامات غريبة ؟؟؟؟

وكان من أحداث 2011 زوال القذافى وثورة فى اليمن وتصفية سوريا من سكانها على أيدى نظام بشار الكلبائي الشهير باللبؤة

توقعات 2012

مزيد من الدماء الزكية لتطهير الثورة من الدنس الذى الحقه بها مجلس العار

كشف مشايخ الإنتخابات أمام الشعب

طنطاوى مع مبارك الى مزبلة التاريخ

بعض ممن لسة قاعدين على الكنبة ياييتنيلوا يفوقوا أو يتنيلوا يريحونا ويبطلوا كلام مرعوب من حرب أهلية وبتنجان بالتقلية.

حفظ الله الوطن وأهلك أعداءه

سؤال أخير كل يوم أسأله لنفسي ..... هل هذا هو جيشنا العظيم الذي دحر اسرائيل فى 73 ؟؟؟؟ هل هو فوق النقد ؟؟؟ كل ما تكلم حد يقوللك الجيش ده خط أحمر هو اللى حمانا .؟؟؟؟ الجيش حمى نفسه يابشر ...الجيش دة انا وانت ؟؟ مافيش واحد يطلع فيهم ويقول ان له فضل علينا علشانه حارب ومات منهم ناس .... اللى بيحارب ده بيحارب علشان مين .. علشان دينه وبلده وأهله .. وأهله مواطنين زينا .. وهو فى شغله زيه زيي مهندس , طبيب , محامى ...مدرس .... الخ .. انا مش باطنطط عليك ياظابط الجيش .. ماتقوليش انا عايش فى الصحرا وبيطلع عين أهلى فى التدريبات علشان احميكم ؟؟ لالالالالالالا ده شغلك اللى بتاخد عليه فلوس .. انت بتشتغل عندى .. انت بتاخد فلوس من الضرائب اللى انا بادفعها .. انا لما باتحال على المعاش مش باخد ربع مليون جنيه ولا بأتعين مدير ادارة هندسية مع ان معلوماتك الهندسية لاتتعدى نظرية فيثاغورث .. ولا باتعين حاكم اقطاعية (محافظ) او رئيس مجلس مدينة .... وحتى لو فلت منك كل ده تشتغل خابور استراتيجى ؟؟؟ احنا من بعض ياجيش .. انت ملكنا .. ومتأكد ان من بينكم ناس وطنيين بتحب البلد وتموت فداءا ً له .. انت بتاعنا مش بتاع المخلوع وتابعه قفة

صحوة أتباع المخلوع

الشيخة ماجدة المكشوف عنها اللحاف بتنادى بإعادة المخلوع؟؟؟؟؟؟ أحسن يقوم زلزال يدمر البلد وبتعو لمليونية علشان المخلوع يرجع فى قرار التنحى ؟؟؟؟؟؟؟؟؟؟؟؟؟؟؟؟؟؟؟؟ لايتندر احد بأنها ولية مجنونة ؟؟؟؟

هل هذا ارهاص بشئ يدبره أعوانه ؟؟؟

واحد تانى ربنا يحميه هو كمان بيقوللك ان فيه حرب أهلية يوم 25 يناير ؟؟؟؟؟؟؟؟؟؟؟؟؟؟

يا خلق .... الثورات لاتقهر .. ربما طال زمن التطهير .. لكن عقارب الساعة لايمكن ان تدور عكس اتجاهها.

المجلس العسكرى او مجلس العار ..... فاشل فاشل فاشل ... وأصبح هو الآخر من مروجى الإشاعات

فرجه قريب

فلما ضاقت واستحكمت حلقاتها حتى ظننت انها لن تفرج ... فرجت .... مثل قديم .. لكن الضيق والاستحكام الآن اكاد أجزم انه صار حول رقاب أغبياء مجلس العار ومناصريهم .. نظام رمز البطة تيفة .... قد يقول البعض باستهزاء هل هذه ديموقراطية وأدب الحوار .. ارد عليه واين منكم من اعاءات العمالة والتخوين التى رميتموها فى وجوه جميع من قال لا لزبانية مجلس العار ... تقولون ان الأغلبية الصامتة تعبت وتريد استقرار .. ييييييييييييييييييه على الكلام التافه المكرر العبيط الذى أصبح لايرد عليه ؟؟؟ فقد هتف هؤلاء الجهلة الأغبياء فى العباسيه افرم افرم يامشير افرم افرم فى التحرير ؟؟؟؟؟؟ وبعدين هتفوا للمخلوع ... وبعدين اتسلطنوا على انغام اغنية سيجارة بنى ؟؟؟ هل يجوز التعليق على كلام الحيوانات ؟؟؟؟؟؟ الكلاب تنبح والقافلة تسير .... وبعدين خرج علينا عبقرينو بتاع مجلة ميكى زمان .. اخده مجلس العار مستشار ... عبقرينو خرج بيان .... قمة فى العبط والتهريج ...؟؟؟ قال ايه ان فيه مؤامرة دولية لإسقاط مصر الدولة والجيش يوم 25 يناير .... طيب مين اللى عامل المخطط ؟؟؟؟ طيب قبضتوا عليهم وهتحاكموهم ؟؟؟ لالالالالالالالالالالالالالالالا ... عبقرينو فلتة زمانه بيستنجد بالمواطنين الشرفاء ( بتوع السيجارة البنى ) علشان يفشلوا المخطط اللولبي ده ؟؟؟؟؟؟؟؟؟؟؟؟؟؟ المفروض انى اركب ديل وأصدق ؟؟؟ والا استنجد بالفيل بتاع عمنا اميتاب باتشان يمكن لما يلعب ودانه واربطه تحت البيت أصدق وأفهم ؟؟؟؟ ان جيشنا المغوار وجميع أجهزته الأمنية والشرطية ياعينى ياحرام من قوة المخطط بيستعين بالمواطنين الشرفاء اللى أحنا طبعا مش منهم؟؟؟؟؟؟؟؟؟ لأن المواطنين الشرفاء معاهم سنج وسواطير ومطاوى وشوم طبعا ً لزوم تسليك السنان ... يعنى مجلس العار عاوز يأدب مصر وشعبها يوم 25 يناير ... أقوللك على لسانى ولو أصبحت الوحيد فى مصر الذى سيقول لك لالالالالالا  ... سأقولها ورزقى ورزق أولادى على الله

سألنى أحدهم .. هو فيه حد فى مجلس العار ده معاه شهادة محو الأمية ؟؟؟؟؟ لم أستطع الإجابة

أول مواطن ابن ........... قصدى شريف أهل دائرته محاصرينه فى بيت وناويين على مالايحمد عقباه

لسة لما نشوف فضائح باقى شرفاء مجلس العار 

ياحبيبتى يامصر

مبارك غار وهانت طنطاوى ومجلس العار وراه ... وستبقى مصر وجيشها

كلنا فشلة

فعلا الكل فشلة ... الفيديو قال كل شئ نقوله من 10 شهور

ولاتعليق بعد ذلك

مولد سيدى الإنتخابات

دم الشهداء من 25 يناير الى 19 نوفمبر فجأة اصبح لا معنى له 

انتخابات بدأت من يوم 28 نوفمبر بعد أن اصرت القوى السياسية على اجراء الإنتخابات العرجاء الكتعاء .... انتخابات مجلس العار .... قتلونا بدم بارد وفاوضوا الإخوان والسلف على التورته .........

وفاز الإخوان والسلف فى المرحلة الأولى بحوالى 70% من القوائم وتقريبا 97 % من الفردى

وزغرتى يا ام المتطاهر ... لقد انتصر الحق والدولة هتبقى اسلامية ( اصلنا كنا مش كدة ) وتبارى الإعلاميون السفهاء فى استضافة الإخوان والسلف ليسألوهم سؤال واحد تافه ومكرر ... هو انتوا صحيح هتمنعوا المايوه البكينى والخمرة والقمار .... ويبدأ الضيف الهمام فى الإجابة البلهاء ومحاولة دفاع عرجاء وعبيطة ... المصيبة انها تتكرر على جميع الفضائيات بدون استثناء .... اما دم الشهداء وحق الأمة فلا يسأل عنها ولا يتطرق لها الشيخ ابو لحية ... منتهى الإسفاف ... منتهى قلة الأدب والذوق .....وطبلى يا ابلتى ( المقصود بأبلتى هو الأخ المشين .... لأن الناس بصراحة برضه انساقت ورا الهبل والعبط والدفاع عن حق المايوه البكينى فى العيش فنسوا الأبلة والمعلم اللى مشرف فى الفندق العالمى وبالمرة نسوا الشهداء ودمهم فكان لازم التذكرة لمن يريد الذكرى ).

وبالمناسبة تصدقوا ان مجلس العار غير الوزارة ... وتصدقوا سموها حكومة انقاذ وطنى وابلتى وصبيانها ملوا الجرايد بالتصريحات الملتهبة وفنجرية البق قالوا الوزارة الجاية ليها كل الصلاحيات ... وقعدوا يدوروا على رئيس وزارة ثورى وشخصية جبارة زى عمنا الأسكندر الأكبر كدة ... يعنى يلم البلد كلها فى 2 كلام ويدخل البلطجية اعشاشهم ... ولقوه ... وياريتهم مالقوه .... عارفين لقوه ازاى ... احكي لكم ومش هاطول .. كان فى بورسعيد زمان تمثال موقفينه ادام مدخل القنال .. كان التمثال ده بتاع عمك الحاج فرديناند دليسبس ... المهم التمثال ده شالوه سنة 56 بعد تأميم الكنال ورموه فى مخازن هيئة قناة السويس ... قوم ايه بقى مجلس العار خد مفتاح المخزن وراح يطلع عمك الحاج ديليسبس لقى جنبه تمثال شبهه بس مكلبظ شوية اسمه الجنزوري .. قاللك فل الفل دا حلو ... وسيب التانى لطلعة جاية ... وشالوا التراب من على الجنزورى ولمعوه وقالوا انه كان من معارضى المخلوع لمدة 18 سنة كان معاه فيها ؟؟؟؟ ازاى مش عارف 18 سنة معارض وكان بيترقى ..... من وزير تخطيط الى نائب رئيس وزراء الى رئيس وزراء .... منتهى الثورية ....وجه عمنا من المخزن واختار افظع وزارة ثوريه من ايام الملك رعمسيس الأول .. ايوة رعمسيس ... 12 وزير من الوزارة اللى فاتت منهم زير الإعلام صاحب المصايب العالمية الى وزيرة التخطيط اللى يفوت القطر بتاع الصعيد 5000 مرة وهى لسة قاعدة بتخطط لإيه الولية دى مش عارف ... وجاب وزير داخليه مالوش حل هو ده اللى هيخليها فللى ... مدير الأمن العام .. اللهم صلى على كامل النور .. بس انتوا هتستهبلوا ليه ماهو جايب بتاع 20 وزير من الشباب .. بأمارة رانيا علوانى وال19 الباقيين حاططهم تحت السرير ...... على فكرة ديليسبس زعلان قوى ... رغم ان محاولات مجلس العار اندوره جاى ومايقلقش ... الا انه بعت للمشايخ بتوع الإنتخابات علشان يعمل حلف معاهم ضد العسكر اللى قنطروه .

وابسط يامعلم وطبلى بذمة يا أبلتى وارقصوا يا عوالم وهيصوا ياصبيان .....وافرح يا بكينى فقد أصبحت حديث الساعة

وليبكى أهالى الشهداء وليصرخ التحرير ... ولا مجيب ....

وينزل جميع الخونة الى ميدان العباسية وبصراحة هو مناسب جدا ً لهم .. فبالقرب منهم العنابر فى المستشفى يخلصوا الطلعة ويرجعوا على طول بلا ميدان مصطفى محمود اللى فى اخر الدنيا ولا غيره ... اهو قريب من السكن برضه يهتفون لمجلس العار بالضبط زى ما كانوا بيهتفوا للمخلوع .............. اتفووووووووووووووووووووو

ارحمنا يارحمن يا رحيم