على الصبح تواردت الأخبار بأن مبارك رجع .. رجع منين يارجالة ورجع على فين ؟؟ بيقوللك رجع الحكم تانى ومعاه ولاده والست حرمه ... ليه هما كانوا مسافرين ورجعوا بالسلامة ... ايوة ياعم دول كانوا بيصيفوا في شرم ازاى بس ياعم الحاج ؟؟ حد يصيف فى فبراير .. الله هو انت ماتعرفش ان عز الصيف فى فبراير الأيام دى ... اه احنا صحيح كنا بنتكتك من البرد واطرافنا مجمدة فى الشوارع بس هم كانوا حرانين فطلعوا يصيفوا في شرم وسابوا العزبة لشيخ الغفر يحرسها لغاية مايرجعوا .... الله امال ايه اللى ودا عياله السجن ؟؟ ... اما انك صحيح حمار .. فيه سجن اسمه طره بيتش ؟؟؟ دا منتجع سياحى حتى بالأمارة اسأل لجنة حقوق الإنسان وتقصى الحقائق اذا كانوا شافوهم فى السجن والا لأ ؟؟ الوحيد اللى قال انه شافهم وصعبانين عليه ياعينى عمك الحاج مرتضى لما راح صيف معاهم شوية وخرج يخزى العين بكام كلمة من اللى الناس بتحبهم ....؟؟؟ الله يعنى الباشا رجع وهيستلم العزبة من شيخ الغفر ؟؟؟؟؟؟
وحياتي عندك ده اللى بيقولوه ؟؟؟؟؟ وكمان البتاع اللى اسمه الواطى كمان راجع اهو بالأمارة ان كل المحليات منه ومافيش حد فيهم مشى يصيف من أساسه ؟؟؟؟ ياجدع انت بتهرج .. دا الإخوان عاملين اليفط والحزب بتاعهم وايام الباشا ما كانوش بيجرأوا يعملوا كدة وكان الباشا مسميهم الجماعة المحظورة ؟؟؟؟ والله انت أثبتت لى بالدليل العملى انك حمار .... محظورة ايه يابنى دى تمثيليات ومسلسلات هابطة بيألفوها وبيخرجوها سوا ... طيب هم لما اخدوا 88 كرسي فى المجلس .. ايه اللى عملوه ضد الباشا ؟؟؟؟ والا ايه المشاريع اللى كانوا بيطالبوا بيها وانتخبناهم علشانها وبدأوا فى تنفيذها .. يا عم الحاج دول الى يومنا الحالى بيجتمعوا فى السر وبعيد عن العينين .. بيتعاملوا برضه على انهم تنظيم سري محظور .... وخد دى كمان شوية الدقون اللى كان امن الدولة بيستخدمهم بكل مهارة وحرفية نازلين لسة فى فتاوى تحريم الخروج على الحاكم ..... الخ؟؟؟؟ المصيبة انهم مسميين نفسهم سلغيين ....
والله عندك حق يبقى الباشا لسة موجود ... ومين قاللك بس انه مش موجود .. باقوللك كان بيصيف
No comments:
Post a Comment