ثورة للعقول

25 يناير يوم مهم فى تاريخ مصر .... لمن..... الآن لكل شعب مصر مؤيدين ومعارضين .. منتهزين ومناصرين ... مسلمين ومسيحيين ...يومها لا أحد سوى من نزل الى الشارع وليس معهم اى دعم من اي نوع .... شوية عيال .. هيتهدوا كمان كام ساعة بالكتير .. الخ من التعليقات الغير مهتمة بالذى يحدث ..... تانى يوم زي اللى قبله .. ظهر علي الدين هلال امين اعلام الحزب الوطنى وقال 30 الف لا يعبرون عن 80 مليون وجارى التعامل معهم ... ونحن على القهاوى نشد على ايدى الرجل اما كرها او حبا فيما يقول ... ثالث يوم .. بضعة الاف لايمثلون الشعب المصري .. ويخرج لك مناضل القهوة ليقول ماهم بيصرخوا بقالهم يومين ولا حد عبرهم ويبنسى نفسه .... جمعة الغضب والذى انفجر فيه بركان الشعب المصري وخرج يساند الشباب اللى اتهروا ضرب وتقتيل 3 ايام لوحده دون اي مساندة ... اما مناضل القهوة .. بدأ يقول دى قلة ادب العيال دول زودوها يروحوا بقى خليهم يفتحوا النت تانى علشان اشيت والعب شوية على النت .... الى ان يعبرنا السيد الرئيس السابق يوم السبت علشان يقول شوية كلام عبيط ويقيل حكومة ليست موجودة اصلا ويعين نفس الشخصيات القذرة فى الحكومة اللى مش موجودة اصلا .. يطلع لك مناضل القهوة ويقوللك ماهو الراجل قاللك اهو ماشى بعد 6 شهور وجبنا لك نائب اهو وهو اللى متنح يجيب نائب بقى له 30 سنة ...سيبوه بقى يشتغل ويصلح .. هو اجدع واحد ممكن يعمل الإصلاح ... يالا نكمل عشرة الطاولة .. العيال دول مش ناويين يجيبوها البر وهيخربوها .... وبعد كام يوم يطلع لك شفيق رئيس الوزرارة اللى مالهاش لازمة ويقوللك ندى العيال دول شوية بنبونى ونعمل لهم التحرير هايد بارك ... ولما يعترضوا يقول العيال دول قلالات الأدب اهايهم ماربوهمش (طبعا نسى او تناسى ان سقط منهم الى هذا اليوم فوق ال 300 شهيد ) ... ويطل علينا المخلوع مرة تانية يوم 1 فبراير ويعيط ويقول عاوز اموت فى بلدى ( ويديه ملوثة بدماء شعبه و أموال الشعب التى سرقها هو وأعوانه) .. يقوم مناضل القهوة ويفز ويطلع مظاهرة تهتف له وتنادى بسقوط الوحشين ( مع ان الوحشين دول لا يعملون فى وظائف رسمية فى الدولة ) لكنه الجهل والعمى ... ويندفع اشباه مناضل القهوة الى التحرير محاولين الفتك بالمعتصمين وينطلق خلفهم القناصة ليقتلوهم بضربات مباشرة واشباه المناضل اياه اخدوا حبوب الشجاعة واخذوا فى رمى المعتصمين بالزجاجات الحارقة (المولوتوف) وكسر الرخام والطوب .. اصلهم قليلى الأدب بيشتموا الريس ....وتطلع حبة فنانات عرايا ( على فكرة كلمة فنان يعنى بالعربية الفصحى حمار) ومعاهم العيلين القرع حسام وابراهيم حسن والجدع القمئ اللى اسمة مرتضى منصور شايلين صور المخلوع ويصفوا المعتصمين بأقذع الألفاظ..والمناضل اياه بعد ماصوته راح فى مظاهرة التأييد قعد على القهوة يقول هم سايبين العيال دى ليه مايدخلوا عليهم بالدبابات ويريحونا منهم .. مال راجل عمل لهم اللى هم عايزينه .... وتتابع الأيام الى ان نصل الي يوم 10 واجتماع المجلس العسكرى التاريخى بدون المخلوع .... ويقعد المناضل على القهوة يقوللك مش هيمشى هم اللى يمشوا ..... ويطلع لنا لسانه ويقول هو الشرعي وهو اللى لازم يقعد ...علشان هو اللى هيصلح نقولله ازاى " من افسد لا يمكن ان يصلح " يقوللك الإستقرار والأمن والأمان؟؟؟؟؟؟؟؟؟؟؟ استقرار ايه .. امن وأمان ايه ماتعرفش .... وفجأة له يوم 11 يمشى المخلوع .... ساعتها وياللعجب العجاب .. تجد هذا المناضل وأشباهه يهللون ويرقصون ويقوللك اخيرا ارتحنا منه ... بيوهمنا انه معانا من أول يوم .. ازاى مش عارف ولا فاهم ..... ويقوللك انا مؤيد بس كنت عاوز استقرار البلد .. سخافة .. استهانة ... لا تعلم ... يستمر الثوار لتحقيق باقى المطالب وازاحة باقى اذيال  المخلوع .. يقوللك انت قليل الأدب ماله شفيق ....ويستمر المناضل من تحت لتحت برمى الثورة بالعمالة للأمريكان واليهود .. والمصيبة انه يرشح لك باقى قذارة النظام البائد لرئاسة الدولة من جديد ويقوللك العيال دول زبالة وماعملوش حاجة .. احنا اللى عملنا كل حاجة.

وفجأة تجد احدهم بيقوللك كفاية كدة عاوزين نشتغل بقى .. اصل الشغل كان مرطرط

عاوزين فلوس مش قلتم لما نمشى المخلوع هنتنغنغ .... ياجدع احنا لسة بنقول ياهادى

عاوزين فلان رئيس اهو احسن من الباقيين ... انت مين من الأساس ؟؟؟ ما انت كنت ساكت ومبسوط بالظلم والذل سيبنا يا اخى نشوف الأصلح ... تفاجأ انه يقوللك بس علاء الأسوانى ما اترباش وقليل الأدب .... اختصر أخطاء ريس الوزراء فى مقابلة تليفزيونية انتحر فيها على الملأ .. لجهله وموالاته للمخلوع

عاوزين نقول نعم فى الإستفتاء مش شوية العيال دول هم اللى هيمشوا رأيهم علينا؟؟؟؟؟؟؟

يطلع لك الجيش اللى تورط فى الإستفتاء الذي ليس له اي معنى لأنه ببساطة نعم ولا تؤدى الى نفس الطريق ( اعلان دستوري لمدة 6 شهور )

مناضل القهوة اللى هو من الأساس من يوم 25 الى الآن مش فاهم حاجة يقوللك المادة التانية وهويتنا الإسلامية

مع العلم ان المادة التانية لم تطرح فى التعديلات أساسا ...... 

أصحاب الثورة الحقيقين يتوارون وراء مناضلى القهاوى اللى اخدوا منهم الأضواء

الإتهامات التى ترمى على من واجهوا الموت دون دفاع عنهم ايضا من مناضلى القهوة

نصيحة اقولها لجيلى ومن فوق سنى ... اتقوا الله .. اتقوا الله سيدخلنا الله الدرك الأسفل من النار ... دعوا مناضلى القهوة الأقذار ساندوا الشباب اعطوهم فرصتهم .. لقد تربينا على الخنوع للحاكم والرضا بالظلم ... اتركوا لهم الأمر فهم اشجع منا ... رفضوا الذل رفضوا الهوان .. ضحوا بالكثير من حيواتهم وصحتهم ....... اتقوا الله فيهم واعرفوا .... يعنى ايه كلمة وطن ... هم اللى عرفوها ... اما نحن لا ... لا تدخلوا بينهم اتركوهم بنقائهم حتى ولو كان النقاء ليس كاملا .. فإننا ملوثين وليس هناك مجال منا للنظافة السياسية .. فنحن لا نختلف عن مناضل القهوة .. اللى معاهم معاهم عليهم عليهم

اما الشباب فأطلب منهم النصيحة لنا ولا يكفوا عن ثورتهم ربما افلحوا فى تغييرنا الى الأفضل ونستطيع التخلص من .... منااضلى القهاوى